10 მარტს ხელი მოეწერა ურთიერთშეთანხმების მემორანდუმს SDSU საქართველოსა და სერვანტესის გიმანზიას (AIA GESS) შორის. ხელმოწერას სკოლის მე-11 და მე-12 კლასების ის მოსწავლეები დაესწრნენ, ვინც STEM დარგებით არიან დაინტერესებული. მათ შორის რამდენიმეს უკვე სერიოზული წარმატებაც აქვს: ჯგუფი "სოლარი", რომელმაც ათასწლეულის ინოვაციების კონკურსში პირველი ადგილი აიღო, სულ მალე ფლორიდაში ნასას კენედის ცენტრში მიემგზავრება. მემორანდუმს ხელი მოაწერეს სან დიეგოს სახელმწიფო უნივერსიტეტის დეკანის მოადგილემ საქართველოში ბატონმა ჰალილ გუვენმა და სერვანტესის გიმნაზიის დირექტორმა ქალბატონმა რუსუდან ბოლქვაძემ. მემორანდუმზე ხელმოწერა ასევე დააფიქსირეს მოსწავლეებმა.
მემორანდუმის ფარგლებში, სკოლაში გაიხსნება STEM კლუბი, ხოლო გიმნაზიის მასწავლებლებს ექნებათ შესაძლებლობა, შემეცნებითი ვიზიტებით ეწვიონ სან დიეგოს სახელმწიფო უნივერსიტეტის კამპუსს კალიფორნიაში.
STEM კლუბი უკვე წარმატებით ფუნქციონირებს გიმნაზიის ფილიალ სკოლაში-ამერიკულ სკოლა-კოლეჯ პროგრესში (ყიფშიძის 7). სადაც მომავალი გამომგონებლები მრავალ საინტერესო პროექტს ანხორციელებენ საქართველოს ტექნიკური უნივერსიტეტის პროფესორის, ფიზიკის მეცნიერებათა დოქტორის, ზოგად საუნივერსიტეტო ვირტუალური ცენტრის ხელმძღვანელის ბატონ დავით სონღულაშვილის ხელმძღვანელობით.
